Qaraqalpaq xalqınıń ullı oyshılı, danıshpan shayırı Berdaq Ǵarǵabay ulınıń 170 jıllıq yubileyin joqarı dárejede ótkeriw maqsetinde 1998-jıl 20-mayda qabıl etilgen Ózbekstan Respublikası Ministrler Kabinetiniń 220-sanlı qararına muwapıq Nókis qalasında Berdaq atındaǵı Qaraqalpaq mámleketlik universiteti janınan Berdaq milliy muzeyi shólkemlestirildi. Muzey 2002-jıl 1-martta óz jumısın basladı.

Ózbekstan Respublikası Ministrler Kabinetiniń 2021-jıl 13-apreldegi 206-sanlı qararı hám Qaraqalpaqstan Respublikası Ministrler Keńesiniń 2021-jıl 15-apreldegi 122-sanlı qararlarına muwapıq Berdaq milliy muzeyi Berdaq atındaǵı Qarakalpaq ádebiyatı tariyxı mámleketlik muzeyi atı menen qayta shólkemlestirildi.

Muzeydiń ulıwma maydanı 1,26 ga, úsh qabattan ibarat bolıp, úlken bir gúmbezden hám kishi altı gúmbezge iye. Muzeydiń proektin sızǵan respublikamızǵa belgili arxitektor, Berdaq atındaǵı mámleketlik sıylıqtıń laureatı O.Tóreniyazov.

Muzeyler xalıq turmısında onıń tariyxı menen baylanatuǵın uǵımǵa iye orın. Muzey bul xalıqtıń hújjetine qosılǵan ómir bayanı. Onda sol xalıqtıń xalıq bolıp qáliplesiwi yaki sol jerdiń áiyemgi tariyxı menen búginine deyingi jolı bayan etiledi. Paytaxtımızǵa óz sawlatı menen sán berip, saltanat qurıp turǵan Berdaq atındaǵı Qarakalpaq ádebiyat tariyxı mámleketlik muzeyi xalqımızdıń jazba mádeniy-ádebiy tariyxın tanıtatuǵın muzeylerdiń biri.

Bul jerde erte dáwirdegi qaraqalpaq ádebiyatınan baslap házirgi dáwirge deyingi xalqımızdıń ádebiy turmısı, ádebiyatı tariyxı, onıń dóretiwshileri haqqında sóz etetuǵın eksponatlar menen bayıtılǵan.

Berdaq atındaǵı Qarakalpaq ádebiyatı tariyxı mámleketlik muzeyi Siziń, muzeyimiz haqqında bildirgen hár qanday sin yamasa rawajlanıwımız ushın bildirilgen usınısıńızdı qabıl etiwge hámiyshe tayar. Sonıń menen birge biz benen bizlerdiń sociyallıq tarmaqlarımız arqalıda baylanısıwıńızǵada bolatuǵınlıǵın bildirip ótemiz.