Muzey fondınıń tiykarǵı dáregi xalqımızdıń uzaq ásirler dawamında qásterlep saqlap kelgen arab, parsı, túrkiy hám eski qaraqalpaq tillerinde jazılǵan eski qol jazbalar, tas baspa kitaplar, medreselerde oqıtılǵan kitaplar, qaraqalpaq klassik ádebiyatı wákilleri haqqında maǵlıwmatlar hám olar dóretken shıǵarmalardıń úlgileri, Berdaq jasaǵan dáwirine tiyisli qaraqalpaq xalqınıń ótmish derekleri bolǵan bezeniw, tutınıw buyımları, kiyim úlgileri, XIX-XX, XXI ásirler qaraqalpaq ádebiyatınıń basıp ótken jolı, tuwısqan xalıqlar menen baylanısı, ilimiy miynetler, tariyxıy tulǵalardı sóz etiwshi kartina hám portretler bolıp tabıladı.
Búgingi kúnde muzeyde 10850 den aslam eksponatlar toplanǵan. Bul eksponatlar respublikamızdıń barlıq qala hám rayonlarınan, awıllardan hám adamlardıń jeke úylerinde usı kúnge shekem qásterlep saqlap kelgen zatların muzeyge ákelip tapsırıw arqalı jıynalǵan biybaha baylıq bolıp tabıladı. Bulardıń ishinde muzey ushın qádirli bolǵan biybaha eksponatlar bar.
Muzeydiń qol jazba hám tas baspa kitaplar fondında házirgi ӯaqıtta 800 den aslam eski arab tilindegi kitaplar saqlanıp kelinbekte. Olardıń arasınan Berdaq shayırdıń ózi kiygen shapanı, shayırdıń áwladlarınıń biri Nókis qalasınıń turǵını Allanova Amangúl tárepinen muzeyge 2014-jılı sawǵa etilgen. Shapan mádeli tawardan tigilgen, ashıq kók-jasıl reńde bolıp, tiykarǵı materialı jipekten tigilgen. Berdaqtıń «Shejire» hám «Xorezm» shıǵarmalarınıń qol jazbası, nókisli Shınar Erjanovanıń úyinde saqlanıp kelingen Ájiniyazdıń «Kız Meńesh penen aytısı» 2 betten ibarat bolıp, muzey ekspoziciyasınan orın iyeleydi. Nókisli Qarabaeva Saliyanıń úyinde saqlanıp kelingen Ájiniyaz shayırdıń «Panıy dúnyaǵa aytqanı» qosıqlarınıń qol jazbası, Qudaybergen Jebegen ulınıń “Márdikar” shıǵarmalarınıń qol jazbası muzeydiń tiykarǵı fondınan orın alǵan.
Sonday-aq, sońǵı jılları muzeydiń qol jazbalar fondın tolıqtırıw maqsetinde úylerge barıp kitaplar jıynawdı dawam ettirildi. Olardıń arasında kegeylishi Allayar Dármenov, Shımbay rayonı, “Shımbay” APJ turǵını Shamshetov Kamal tárepinen 100 den aslam eski arab tilindegi kitaplar, Taxtakópir rayonı, “Xalıq” jame meshiti tárepinen 400ge shamalas eski arab tilindegi kitaplar muzey fondına qabıl etildi.
Sonday-aq, Ózbekstan Qaharmanı, Ózbekstan hám Qaraqalpaqstan xalıq shayırı I.Yusupovtıń 2000nan aslam úy kitapxanası, Ózbekstan xalıq shayırı T.Jumamuratovtıń úyinde saqlanıp kelingen 100 den aslam zatları, shayır hám qıssaqan, Berdaq atındaǵı mámleketlik sıylıqtıń birinshi laureatı Abbaz Dabılovtıń, Qaraqalpaqstan xalıq jazıwshısı Á.Tájimuratov, Qaraqalpaqstan xalıq shayırı K.Raxmanov, T.Kabulov, Qaraqalpaqstan xalıq jazıwshısı Sh.Usnatdinov, jazıwshı hám ilimpaz S.Nietullaev, Berdaq sıylıǵınıń laureatları, jazıwshı A.Bekimbetov, A.Sadıqov, belgili jurnalist hám jazıwshılar A.Xalmuratov, K.Smamutov, satirik jazıwshı hám shayırlar B.Qazaqbaev, S.Niyetullaevlardıń úy arxivlerinen alınǵan qol jazbaları, kitapları, hújjetleri, súwretleri, orden-medalları, byustleri, portretleri, ózleri paydalanǵan jeke buyımları saqlanbaqta.
Sonday-aq, qaraqalpaq ádebiyatı iliminde óz ornına iye Orta Aziyadaǵı birinshi filologiya ilimleriniń doktorı, professor Nájim Dáwqaraevtıń úy arxivinen ózine tiyisli bolǵan qol jazba úlgileri, hújjetleri, súwretleri hám t.b. muzey fondınan orın alǵan.