XX ásir ádebiyatı wákilleri shıǵarmaları óz aldına kitap bolıp shıǵarılıw imkaniyatına iye bolıw menen birge dóretpeleri qońsılas xalıqlar arasına taralıp keń óris alǵan dáwiri boldı.
I.Fazılov, Q.Áwezov, Á.Ótepov, N.Dáwqaraev, A.Dabılov, S.Nurımbetov, A.Begimov, K.Sultanov, J.Aymurzaev, X.Seytov, T.Jumamuratov, B.Qayıpnazarov, T.Qayıpbergenov, I.Yusupovlardıń dóretpeleri óz aldına kitap bolıp bir neshe mıń nusqalarda basılıp shıqtı. Bul dáwirde ádebiyatta jańa janrlar payda bola basladı, dramalıq shıǵarmalar, romanlar dóretile basladı. Q.Áwezovtıń “Tilek jolında”, Á.Ótepovtıń “Teńin tapqan qız” N.Dáwqaraevtıń “Ernazar Alakóz” dramaları qaraqalpaq teatr saxnasına qoyıldı. A.Begimovtıń “Balıqshınıń qızı” romanı qaraqalpaq ádebiyatında birinshi romanlardan bolıp, A.Dabılov, S.Nurımbetov, J.Aymurzaev, B.Qayıpnazarov, X.Seytovlardıń qosıqları urıs jılları dańqı dúnyaǵa jayıldı.
Mámleketimiz tárepinen dóretiwshi tulǵalardıń miynetleri bahalanıp Qaraqalpaqstan xalıq shayırı, Qaraqalpaqstan xalıq jazıwshısı degen húrmetli atakları berile basladı.
1967-jılı Berdaq atındaǵı mámleketlik sıylıq shólkemlestirilip, A.Dabılov “Bahadır” dástanı ushın birinshi Berdaq sıylıǵınıń laureatı boldı.
XX ásir qaraqalpaq ádebiyatı bólimine sol dáwirdi izertlewshi alımlardıń miynetleri hám olar haqqında maǵlıwmatlar qoyıladı.
XXI ásir bası qaraqalpaq ádebiyatınıń eń jetilisken dáwiri boldı. Qaraqalpaq jazıwshı shayırları shıǵarmaları bir neshe tillerge awdarılıp, dúnyanıń kóplegen ellerinde járiyalandı. Qaraqalpaq jazıwshı-shayırları da dúnya xalıqlarınıń eń jaqsı shıǵarmaların qaraqalpaq tiline awdardı.
S.Xojaniyazov, T.Seytjanov, T.Qayıpbergenov, I.Yusupov, Sh.Seytov, U.Xojanazarov, K.Raxmanov, U.Pirjanov, T.Mátmuratov, T.Qabulov, K.Mámbetov, G.Matyakupova, N.Tóreshova, J.Izbasqanov, G.Esemuratova, O.Abduraxmanov, K.Allambergenov, K.Karimov, M.Nızanov, X.Dáӯletnazarov, G.Raximova, Sh.Usnatdinov, A.Abdiev, A.Sultanovlar XX ásir hám XXI ásir qaraqalpaq ádebiyatınıń rawajlanıwına, keń óris alıwına salmaqlı úles qosqan.
Sonıń menen birge bul bólimde sol dáwir ádebiyatın izertlewshi alımlar haqqında maǵlıwmatlar, olardıń miynetleri de orın alǵan.