Bul kórgizbemizdin tiykarǵı maqseti XVIII-XIX ásirlerde ómir súrgen qaraqalpaq klassik ádebiyatınıń iri tulǵaları bolǵan Jiyen jıraw, Kúnxoja, Berdaq, Ájiniyaz, Ótesh shayırlar haqqında maǵlıwmatlar beriw, olardıń ómir jolı menen tanıstırıw. Sonlıqtan da bul kórgizbede shayırlardıń shıǵarmaları menen birge olar haqqında jazılǵan pikirler, biybaha qol jazba kitaplar, portretler, súwretler hám de qaraqalpaq klassikalıq ádebiyat izertlegen ilimpazlardıń miynetleri, súwretleri, ótkerilgen konferenciya materialları orın aladı.
Muzeyimizdiń Berdaq zalı «Jáhán maǵan háwes etip qarasın» - dep ataladı. Onda Berdaq dáwirine tiyisli tariyxıy dárekler, shayırdıń jasaǵan jeri haqqında kartanıń úlgisi, Berdaq jasaǵan dáwirdegi tutınıw buyımları, bezeniw buyımları, kiyim úlgileri, Berdaq babamızdıń áwladlarında saqlanıp kelgen ullı babamızdıń ózi kiygen shapanı, medresede oqıtılǵan kitaplar, Berdaqtıń úrim-putaqlarınıń geneologiyalıq shejire kestesi hám olar haqqında maǵlıwmatlar, xudojniklerdiń Berdaq shıǵarmaları tiykarında islegen kartinaları qoyılǵan.
Mádeli shapan-muzeydiń tiykarǵı fondınan orın alǵan. Bul shapan Berdaq shayırdıń ózi kiygen shapanı bolıp, shayırdıń áwladlarınıń biri Nókis qalasınıń turǵını Allanova Amangúl tárepinen muzeyge 2014-jılı sawǵa etken. Shapan mádeli tawardan tigilgen, ashıq kók-jasıl reńde bolıp, tiykarǵı materialı jipekten tigilgen. Astarı juqa paxta gezlemeden islengen. Shapannıń aldıńǵı oń tárepinde kókirek tusında, eki jeńiniń ushınan bir qarıs joqarısında jırmıshı bar. Jırmıshtıń dógerekleri qızıl jipek sabaq penen jiyeklengen. Shapannıń boyı 1metr 22 sm, diametri 1 metr 20 sm, jeńiniń uzınlıǵı 65 sm, jeńiniń awzı 28 sm degi ólshemde.
Berdaq babamız kiygen shapan.
Allanova Amangúl tárepinen 2014-jılı tapsırılǵan.
Berdaq óziniń ataqlı «Izler edim» shıǵarmasında «Nawayıdan sawat ashtım» dep, -Nawayı óziniń ruwxıy ustazı ekenligin kórsetedi. Saadiy, Fizuliy, Xorezmiy, Maqtumkulı shıǵarmaların jaqsı bilgenligi haqqında maǵlıwmat beredi. Sonıń ushın da Berdaq zalında Álisher Nawayınıń byustin hám onıń «Hamsa» shıǵarması, Saadiy, Fizuliy, Xorezmiy, Maqtumkulı shıǵarmaları orın alǵan.
Berdaqtı izertlegen ilimpazlarımızdıń monografiyaları, Berdaqtıń tańlamalı shıǵarmaları kórsetiledi. Berdaq shıǵarmalarındaǵı danalıq sózler, Berdaq haqqında ullı insanlardıń pikirleri da ekspoziciyadan orın alǵan.