«Ábdiraman Ótepov hám Sapar Xojaniyazovlar – dramaturg bolıp tariyxta dańq taratqan insanlar»

«Berdaq kúnleri» hápteligi sheńberinde Qaraqalpaq teatr óneriniń ullı tulǵaları Á.Ótepovtiń 120 hám S.Xojaniyazovtıń 115 jıllıǵına baǵıshlanǵan «Ábdiraman Ótepov hám Sapar Xojaniyazovlar – dramaturg bolıp tariyxta dańq taratqan insanlar» atamasındaǵı ádebiy keshesi bolıp ótti. Keshege Ózbekstan hám Qaraqalpaqstan xalıq artisti R. Saparova, Qaraqalpaqstan xalıq artisti S.Dáwletova, Qaraqalpaqstanǵa xızmet kórsetken mádeniyat xızmetkeri K. Shamuratova, Qaraqalpakstan Respublikasına xızmet kórsetken kórkem-óner ǵayratkeri, Berdaq atındaǵı Qaraqalpaq mámleketlik akademiyalıq muzıkalı teatrınıń saxnalastırıwshı rejissyorı B.Baymurzaev, Ózbekstan mámleketlik kórkem- óner hám mádeniyat institutı Nɵkis filialı, Innavacion texnologiyalar universiteti, student jasları, Nókis qánigelestirilgen mádeniyat mektebiniń «muzıkalıq drama» bóliminiń ustaz oqıtıwshıları hám oqıwshıları, S.Xojaniyazovtıń áwladları qatnastı. Ilajda shıǵıp sóylewshiler teatr kórkem-óneriniń xalqımız turmısındaǵı tutqan ornı, kórkem-óner tarawınıń ózine tán kıyınshılıqları, sonday-aq teatr óneriniń rawajlanıwında áhmietli orın ielewshi dramaturgiya tarawı haqqında, Respublikamızda bul tarawdı ele de jetilistiriw ushın ámelge asırılıwı zárúr ilajlar haqqında pikirler aytıldı. Ádebiy keshe saz-sáwbet keshesine ulasıp, teatr aktyorları hám jas atqarıwshılar tárepinen epizodlar hám qosıqlar atqarılıp kesheniń ele de payızlı ótiwine úles qostı.