«QARAQALPAQSTAN XALÍQ XUDOJNIGI»-BARLÍQBAY AYTMURATOV

«QARAQALPAQSTAN XALÍQ XUDOJNIGI»-BARLÍQBAY AYTMURATOV
Barlıqbay Aytmuratov 1957-jılı Kegeyli rayonında dúnyaǵa kelgen.
1980-jılı Tashkent qalasındaǵı A.N. Ostrovskiy atındaǵı Teatr hám kórkem-óner institutınıń teatr hám kino jivopisi bólimine oqıwǵa túsip, 1986-jılı oqıwın tamamlaǵan. Sol jılı Berdaq atındaǵı muzıkalı-drama teatrında saxna xudojnigi bolıp miynet jolın baslaǵan. Onıń dóretiwshilik jolı 1970-jıllardıń sońınan baslanǵan. Dáslep peyzaj janrında islep, sońınan tariyxıy baǵıttaǵı portretler hám tematikalıq kartinalar jaratqan. Óz dóretpelerinde qaraqalpaq xalqınıń tariyxı, milliy úrp-ádetleri hám belgili tulǵaların kórkem túrde sáwlelendirgen. B.Aytmuratov syujetli súwretlew hám portret janrınıń sheberi bolıp, ádebiyat, kórkem-óner hám ilim ǵayratkerleriniń portretler toplamın jaratqan.
Onıń «Toy» (1981) kartinası hám kóshpeli xalıqlardıń turmısın kórsetetuǵın kólemli kartinaları ayırıqsha orın ieleydi. Xudojnik grafika tarawında da nátiyjeli miynet etip, Qaraqalpaq folklorınıń 100 tomlıǵına grafikalıq jumıslar islegen.
Onıń bir qatar dóretpeleri respublika muzeylerine tapsırılǵan. Búgingi kúnde 18 dana kartinası I.V.Savickiy atındaǵı Mámleketlik kórkem-óner muzeyinde saqlanbaqta.
1990-jıl — Ózbekstan Xudojnikler awqamınıń aǵzası
1991-jıl — Ózbekstan Kórkem-óner akademiyasınıń aǵzası
1996-jıl — «Ernazar Alakóz» kartinası ushın Berdaq atındaǵı Mámleketlik sıylıq laureatı
2001-jıl — «Qaraqalpaqstan Respublikasına miyneti sińgen kórkem-óner ǵayratkeri»
2009-jıl — Ózbekstan Kórkem-óner akademiyasınıń gúmis medalı iyesi.
В.Aytmuratov dóretpelerinde qaraqalpaq xalqınıń milliy ruwxı, tariyxı hám mádeniy miyrasın kórkem tilde sáwlelendiredi.