Husniddin Hámidovtıń 90 jıllıǵına baǵıshlanǵan «Husniddin Hámidov Shıǵıs qoljazbaların izertlewshi alım» atlı ádebiy keshe

Berdaq atındaǵı Qaraqalpaq ádebiyatı tariyxı mámleketlik muzeyinde «Berdaq kúnleri» hápteligi sheńberinde ullı ilimpaz, qaraqalpaq derektanıwı iliminiń tiykarın salıwshı, akademik Husniddin Hámidovtıń 90 jıllıǵına baǵıshlanǵan «Husniddin Hámidov Shıǵıs qoljazbaların izertlewshi alım» atlı ádebiy keshesi ótkerildi. Keshege professor oqıtıwshılar, ustazdıń shákirtleri, shańaraq aǵzaları hám student jaslar qatnastı. Ilajdı muzey direktorı Sh.Payzullaeva ashıp, H.Hámidovtıń ilimdi rawajlandırıwda, qoljazba miyraslardı úyreniwde hám jas izertlewshilerdi tayarlawda qosqan úlken úlesin atap ótti. Filologiya ilimleriniń doktorı, professor Sh. Ábdinazimov mazmunlı bayanat jasap, ilimpazdıń ilimiy miyrası hám onıń qaraqalpaq tili hám ádebiyatı tariyxına qosqan úlesi haqqında sóz etti. Sońınan muzeydiń aǵa ilimiy xızmetkeri, derektanıwshı X.Hamidovtıń shákirti Á.Idrisov H. Hámidovtıӊ qaraqalpaq qoljazbatanıw hám derektanıw iliminiń tiykarın salǵanlıǵı, miynetleriniń házirgi ilim ushın áhmieti, onıń metodologiyalıq mektebi hám dástúrleriniń búgingi izertlewlerde dawam etip atırǵanı haqqında aytıp ótti. Keshe kóterińki ruwxta ótip, ilimiy jámietshilik ushın áhmietli waqıyaǵa aylandı hám ustaz H.Hámidovtıń xalqımızdıń mádeniy hám ruwxıy miyrasına qosqan biybaha úlesin eske salıwǵa xızmet etti.