Akademik Sabır Kamalov 100 jasta

Berdaq atındaǵı Qaraqalpaq ádebiyatı tariyxı mámleketlik muzeyinde Ózbekstan Respublikası Ilimler akademiyası Qaraqalpaqstan bólimi Qaraqalpaq gumanitar ilim-izertlew ilimiy institutı hám muzeydiń shólkemlestiriwinde Ózbekstan hám Qaraqalpaqstan Respublikalarına miyneti sińgen ilim ǵayratkeri, Berdaq atındaǵı Qaraqalpaqstan Respublikası mámleketlik sıylıǵınıń laureatı, Oraylıq Aziyanıń belgili tariyxshılarınıń biri, Qaraqalpaqstan iliminiń kárwanbasısı, Ózbekstan hám Qaraqalpaqstan iliminiń rawajlanıwına salmaqlı úles qosqan, Ózbekstan Ilimler akademiyasınıń akademigi, tariyx ilimleriniń doktorı, professor Sabır Kamalovtıń 100 jıllıǵına arnalǵan «Sabır Kamalov hám Qaraqalpaqstan ilimi» atamasındaǵı respublikalıq ilimiy konferenciya bolıp ótti.

Dáslep muzeyde S.Kamalovtıń ilimiy miynetleri, jeke hújjetleri, fotosúwretleri, jaratqan ilmiy mektebin óz ishine jámlegen kórgizbesi bolıp ótti.

Ilimiy ánjumandı muzey direktorı Sh.Payzullaeva basqarıp bardı. Ilajda S.Kamalovtıń awıllasları, kásiplesleri, belgili tariyxshı ilimpazlar, shákirtleri hám shańaraq aǵzaları shıǵıp sóylep, akademiktiń ilimiy-dóretiwshilik jolı, respublikamızdıń ilimin rawajlandırıwdaǵı ayrıqsha xızmetleri haqqında aytıp ótti.