«Jańa dáwir jadidshileri»

Berdaq atındaǵı Qaraqalpaq ádebiyatı tariyxı mámleketlik muzeyinde Ájiniyaz atındaǵı Nókis mámleketlik pedagogikalıq institutı menen birgelikte «Jańa dáwir jadidshileri» atlı kórgizbe shólkemlestirildi. Kórgizbeni muzey direktorı Sh.Payzullaeva ashıp berdi. Bunnan soń, t.i.d (DSc) S.Nurjanov «Xalıqtıń sanasın oyatıwda jadidshilik háreketiniń ornı» Pedagogika ilimleri kandidatı, docent Q.Seytmuratov, «Qaraqalpaqstandaǵı dáslepki jadidler mektebi» temasındaǵı qızıqlı dereklerge bay bayanatları menen qatnastı. Ájiniyaz atındaǵı Nókis mámleketlik pedagogikalıq institutınıń hám «Muhammed ibn Ahmed al-Beruniy» orta arnawlı islam bilim jurtınıń studentleri ilajda belsene qatnasıp, jadid babalarımızdıń qaldırǵan bay miyrasları, shıǵarmaları, paydalanǵan kitapları, qoljazbaları hám súwretlerinen ibarat kórgizbeni úlken qızıǵıwshılıq penen tamashaladı. Keshe sońında qatnasıwshılar jadidlerdiń xalqımızdıń oy-sanasın oyatıwdaǵı rolin tereń túsinip, olardıń máńgi óshpes izine jáne bir márte tájim etti. Bunday kórgizbeler ósip kiyatırǵan jas áwladlardıń tariyxqa, jadid babalarımızdıń aǵartıwshılıq jolına húrmetin arttıradı.