Abadan Saparovanıń 80 jıllıǵına baǵıshlanǵan «Xalıq miyrasın mehirine qarıǵan dóretiwshi insan» atamasındaǵı saz-sáwbetli keshe

Berdaq atındaǵı Qaraqalpaq ádebiyatı tariyxı mámleketlik muzeyinde «Qaraqalpaqstan Respublikasına miyneti sińgen kórkem-óner ǵayratkeri, Ózbekstan hám Qaraqalpaqstan Respublikalarınıń xalıq bilimlendiriwiniń aǵlası, Abadan Saparovanıń 80 jıllıq yubileyine arnalǵan «Xalıq miyrasın mehirine qarıǵan dóretiwshi insan» atamasındaǵı saz-sáwbetli keshesi bolıp ótti. A.Saparova ómiri dawamında qaraqalpaq mádeniyatın rawajlandırıwǵa, qosıqshılıq mádeniyatınıń alǵa ilgerilewine óz namaları menen úles qosqan kompozitor. Ómiri dawamında 50 den aslam nama jazǵan kompozitordıń 70-jılları jaslardıń tillerinen túspeytuǵın Sh.Mambetmuratov sózine «Pal hárresi yańlı izledim seni», S.Dawletaliev sózine «Ushırasıw» qosıqlarına jazılǵan namaları qaraqalpaq saz mádeniyatında óz aldına basqısh boldı. Kesheni muzey direktorı Sh.Payzullaeva ashıp berip, A.Saparovanıń adamgershilik páziyletleri, onıń xalqımız kórkem-ónerine, mádeniyatına qosqan úlesi, keleshegimiz bolǵan jas áwladlarǵa qaldırǵan biybaha miyrasları haqqında toqtalıp ótti. Keshege Qaraqalpaqstan Respublikası Joqarǵı Keńesi komitet baslıǵı M.Atamuratov, Qaraqalpaqstan Respublikası Ministrler Keńesiniń Turizm, mádeniyat, mádeniy miyras hám ǵalaba kommunikaciyaları máseleleri boyınsha sekreteriat baslıǵı Z.Ómirbekov, Qaraqalpaqstan Respublikası mádeniyat ministri B.Temirbaev, Qaraqalpaqstan Jazıwshılar awqamı baslıǵı K.Karimov, Ózbekstan Ilimler akademiyası Qaraqalpaqstan bólimi baslıǵı T.Ábdijapbarov, «Milliy tiklanish» demokratiyalıq partiyası Qaraqalpaqstan Respublikası keńesi baslıǵı T.Romanov,Ózbekstan Respublikasına miyneti sińgen kórkem-óner ǵayratkeri Q.Zaretdinov, QMU oqıtıwshısı, professor B.Ábdikamalov, nuranıy ustaz M.Turımbetova, Qaraqalpaqstan xalıq shayırı G.Matyakupova h.t.b. birqatar elimizge belgili kórkem-óner ǵayratkerleri, keń jámietshilik wákilleri shıǵıp sóylep A.Saparovanıń 80 jıllıq yubileyi yubiley jası menen qutlıqlap uzaq ómir hám dóretiwshilik tabıslar tiledi. Keshede sonday-aq, Ózbekstan, Qaraqalpaqstan, Tatarstan xalık artisti T.Doshumova, Qaraqalpaqstan xalıq artisti artist R.Qutekeeva, Ózbekstan hám Qaraqalpaqstan xalıq artisti M.Sapaevalar A.Saparovanıń jazǵan nama qosıqların atqarıp kesheniń ele de payızlı hám kóterińki ruwxta ótiwin támiyinledi.