​Qaraqalpaq xalıq shayırı Annaqul Mámbetxoja ulı (1841-1936 jıllar)

Annaqul Qaraqalpaqstannıӊ Taxtakópir rayonı territoriyasında jasaǵan shayır. Onıń az muǵdardaǵı shıǵarmaları bizge jetip kelip, tiykarǵı mazmunı qazıw hám onıń awırmanlıǵı, hámeldarlardıń xalıqqa islegen qısımı, tuwǵan jerdi súyiw, muhabbat h.t.b. Shayırdıń barlıq qosıqlarında haqıyqatlıq, azatlıq, xalıq turmısınıń jaqsılanıwı ushın gúres ideyaları ortaǵa taslanadı. Qosıqları: «Bizge jarıq dúnya qashan keledi», «Qazıwda», «Kók ózek boyı», «Aman júr», hayal-qızlarǵa baǵıshlanǵan «Kızlar», «Tawıp ber», «Qızlardıń», «Barmeken» h.t.b. Olardıń mazmunına keletuǵın bolsaq: Ms: «Qazıwda» qosıǵında ılayǵa dizeden batıp, ústi –bası qırq jamaw, ashlıqtan bel-kepshesin kóteriwge halı kelmey turǵan qazıwshılar, qolına qamshı uslap olardı qamshı menen malday sabap atırǵan miyrimsiz baylar, hámeldarlardı áshkara etip,

«Birewler anıq tutıldı,

Aqsha bergenler qutıldı»- dep qazıwdıń qıyınshılıǵı tek miynetkesh xalıqtıń moynına túskenligin túsindiredi.

Ulıwma alǵanda Annaqul shayır óz zamanınıń aldıńǵı ideyadaǵı azamatı boldı. Onıń ólmes shıǵarmaları biziń dáwirimiz ushında bahalı bolıp qaladı.