​"ShEJIRE"

Berdaq shayırdıń dóretiwshiligi XIX ásirde jasaǵan qaraqalpaq xalqınıń kórkemlik enciklopediyası boldı. Óytkeni, onıń óz zamanındaǵı jámietlik ómirdiń həmme tárepin sóz etken ájayıp lirikalarındaǵı, arnawlı túrde jazıp qaldırılǵan xalıq shejiresindegi, tariyxıy həm basqa da dástanları biziń ushın bahası joq tariyxıy etnografiyalıq derek bolatuǵınlıǵı sózsiz. Berdaqtıń ádebiyat maydanındaǵı úlken jańalıǵınıń biri-sóz óneriniń kúshi menen xalıq tariyxın "Shejire"sin jazadı. Berdaq shayırdıń "Shejire"si-bul qosıq penen bayanlanǵan tariyxıy jılnama. Bul jerde Berdaq hám shayır, həm tariyxshı. Bul shıǵarma-qısqasha epikalıq tariyxıy jılnama, ruwlardıń, qáwimlerdiń, Orta Aziya xalıqlarınıń, olardıń kelip shıǵıwı haqqında jazba derekler, awızsha ańızlar tiykarında aytılǵan áńgime. Shıǵarmada tek qaraqalpaqlardıń tariyxı haqqında ǵana emes, al ózbek, túrkmen, qazaq xalıqlarınıń tariyxına tiyisli bahalı hám qızıqlı pikirler aytılǵan, qıtay, mongol, iran xalıqlarınıń tariyxı boyınsha da bir qatar maǵlıwmatlar saqlanǵan