​Xázireti Murat shayıq Aziyz Baba xoja ibn Ishim Sultan Muhammed Bahadur xan. (1675-1748)"

Maman biydiń ustazı, oǵan tálim bergen óz dáwiriniń ilimli, bilimli, karamatlı tulǵası.

Ol qaraqalpaqlar atınan 1743-jılı 14 - fevralda Peterburgda, imperator sarayında qabıllanǵan elshiler toparınıń quramında bolǵan. 1743 – jılı elde qalǵan qaraqalpaqlardıń ústine Kishi júz qazaqlarınıń xanı Abılqayır topılıs jasap, qaraqalpaqlardıń bólinip ketiwine sebepshi bolǵan. Qaraqalpaqlardıń bir bólegi (Sultanbek biy h.t.b.) Sırdı órlep, Jońǵar xanlıǵına ketedi hám rus ilimpazları olardı joqarı qaraqalpaqlar dep ataydı. Tómengi qaraqalpaqlar atın alǵan ekinshi bir bólegi (Murat shayıq h.t.b.) Buxara ámirligi hám Xiywa xanlıǵı soramına ótedi.

Murat shayıq basım kópshiligi qıtay – qıpshaqlar, óziniń aǵayin – tuwǵan xojaları bolǵan eli menen Qaraózektegi "Nurım túbek" tiń etegine kelip qonıs basadı. Aradan bes jıl ótkennen keyin dúnyadan kóz jumıp, mazarı zıyaratshılardıń tawap etetuǵın ornına aylanadı. Murat shayıq qaraqalpaqlardıń siyasiy, mádeniy, ekonomikalıq, sawda baylanısların qáliplestiriw ushın arqadaǵı Rossiya eliniń áhmietin túsingen hám eki el arasında sawda hám elshilik baylanısların rawajlandırıwǵa kóp úlesin qosqan tariyxıy tulǵa.