Aqırzaman kitabı

Aqırzaman kitabı

Avtor: Súlayman Baqırǵaniy, Hákim ata.

Diniy-tárbiyalıq áhmietke ie ádebiy estelik. Qıyamet kúni, aqırzaman hám o dúnyanı bayanlawǵa baǵıshlanǵan. XX ásirdiń basına deyin túrkiy xalıqlar sonıń ishinde qaraqalpaqlar arasında keń tarqalǵan diniy kitaplardıń biri bolǵan. 1847-jıldan baslap bir neshe márte qayta basılıp shıǵarılǵan. "Aqırzaman" kitabın rus tiline E.Malov awdarǵan hám 1897-jılı járiyalanǵan.

Baslanıwı: Erni neták yarattı ersá kúnni háman, Aynı neták yarattı ersá kúnni háman

Mazmunı: Musılman kitaplarında kelgen aqırzaman belgileri haqqında aytıladı. Aqır zaman shamalasqanda alımlar más qılıwshı ishimlikler ishiwi, zina qılıwı, hadal is turǵanda haram iske ósh bolatuǵını, onnan keyin Alla taala bále esiklerin ashıwı, kápirlerdiń shad bolıp, mómin bendelerdiń ǵamgún bolıwı, kóp háeller jesir, gódekler jetim qalıwı, Dájjaldıń shıǵıwı, Máhdiydiń Dájjal menen urısıwı, Íysa áleyhissalamnıń Máhdiyge járdem berip Dájjaldı jeńiwi, onnan keyin Yajuj, Majujdıń shıǵıp kóp musılmanlardı hálek qılıwı, Dabbatul-arz (jer maqluqı) shıǵıp, Qurannıń aspanǵa kóteriliwi, keyin Alla taalanıń pármanı menen Ísrafıl perishte súrdi shalıp aqırzaman bolıwı qosıq qatarları menen ádebiylestirilip bayanlanǵan.