Qoljazbalar menen tanısıw

Muzey fondına jaӊadan qosılıp atırǵan qoljazbalar menen tanıstırıwdı dawam etemiz.

Qoljazba ataması: الرسالة الشمسية فى قواعد المنطقية ar-Risala ash-Shamsiyya fiy qawaid al-mantiqiyya

Avtorı: Najmuddin Áliy ibn Umar ibn Áliy ál-Qazwiyniy, ál-Kátibiy (miyladiy 1276 wafat etken)

Ilim tarawı: Mantıq (Logika)

Mazmunı: Bul shıǵarma muqaddima yaǵnıy kirisiw, úsh maqala hám juwmaqlaw xatimadan ibarat. Shıǵarma mantıq ilimine tiyisli bolıp, onda túrli logikalıq máseleler kórip shıǵılǵan. Shıǵarma Oraylıq Aziya medreselerinde logika iliminen sabaqlıq retinde oqıtılǵan. Keyingi dáwir ulamaları ushın logika ilimi boyınsha bahalı derek bolıp xızmet etken. Bul shıǵarmanıń bir neshe nusqaları bar hám shıǵarmaǵa bir qansha sharhlar yaǵnıy sholıwlar jazılǵan.

Arab tiliniń grammatikası boyınsha ál-Kafiya, Awamil qusaǵan kitaplar menen qosıp bir muqaba ishinde jazılǵan. Soǵan qaraǵanda medrese talabasınıń yamasa mudarrisiniń kitabı bolıwı múmkin.

Nusqa tolıq saqlanǵan. Kólemi 29 paraq.

Baslanıwı: «wa rattabtuhu ala muqaddimatin wá sálasi maqolatin wá xotima …»

Kóshirilgen jılı: hijriy 1209. Miyladiy 1794-jılǵa tuwra keledi. Yaǵnıy bunnan 231 jıl burın kóshirilgen nusqa.

Kátip: Qulmuhammed ibn Ernazar suwfı.

Tayarlaǵan: muzeydiń aǵa ilimiy xızmetkeri Abdusalim Idrisov