SÁWKELE

Hayal-qızlardıń ayrıqsha kiyimleriniń bir túri—sáwkele. Sáwkele naǵıs penen kestelep tigilgen, hár túrli altın-gúmis penen bezelgen, júdá áyemgi dáwirlerden kiyatırǵan hayal-qızlardıń bas kiyimi esaplanadı. Sáwkele eki bólimnen ibarat bolıp, birinshisi tumaq yamasa tóbelik dep atalsa, ekinshisi quyrıqsha yaki halaqası dep ataladı. Sáwkele parsı tilinen alınǵan bolıp ,“sho kuló” patsha bas kiyimi degen mánini ańlatadı. Sáwkele kózdiń jawın alatuǵın qızıl marjan hám altın, gúmis taǵılıp qızıl ushıǵa tigilgen ǵayrı naǵısları bir-biri menen sheber úylesip turadı. Tariyxshılardıń maǵlıwmatına qaraǵanda áyemgi massaget jawınger hayalları sáwkeleni jawınger bas kiyimi sıpatında urıslarǵa túsken waqtında paydalanǵan. Belgili tariyxshı akademik S.P.Tolstov sówkele eramızdıń basındaǵı Xorezm patshasınıń tajı bolǵan degen edi. Sońlıqtan da bul kiyim hám áskeriy hám hákimshilik áhmietke iye bolǵan. Sáwkele qaraqalpaqlardıń qol óneriniń bahalı dóretpesi esaplanadı.