ÁDEBIYAT HÁM MUZEY DÚNYASÍNDAǴÍ AWDARMALAR ǴÁZIYNESI

Muzey xalqımızdıń alıs ásirlerden berman saqlanıp kiyatırǵan hasıl múlki, kewil ǵáziynelerinde muqaddes dep túsinilgen miyrasların toplap hám keń jámiytshilikke kórsetetuǵın mádeniy oray. Sonlıqtan da, xalıq turmısında onıń tariyxı menen baylanatuǵın uǵımǵa ie bolǵanı ushın muzeyler - xalıqtıń hújjetine qosılǵan ómirbayanı bolıp esaplanadı. Onda sol xalıqtıń xalıq bolıp qaliplesiwi yaki sol jerdiń áyemgi tariyxı menen búginine deyingi jolı bayan etiledi.

Berdaq atındaǵı Qaraqalpaq ádebiyat tariyxı muzeyine tán xalqımızdıń erte dáwirlerden búgingi kúnge deyingi ómir jolın sáwlelendirgen ádebiy nusqaları, erte dáwirdegi qaraqalpaq ádebiyatı, xalıq awız eki dóretpeleri, qol jazba miyrasları, qaraqalpaq klassik ádebiyatımız tulǵaları, XX hám XXI ásirler qaraqalpaq ádebiyatınıń wákilleri hám olardıń dóretpelerindegi xalqımız tariyxında tereń iz qaldırǵan tariyxıy tulǵalar haqqında, Ózbekstan Respublikasınıń ǵárezsizlik jıllarında, sonıń ishinde Qaraqalpaqstan Respublikasınıń ǵárezsizlik jıllarında kórkem ádebiyattaǵı erisken tabısları haqqında sóz etiwden ibarat.

Muzeyimiz xalıqaralıq birge islesiw jumısları sheńberinde ótken 2023-jılı Qazaqstan Respublikasındaǵı Abay atındaǵı mámleketlik memoriallıq-korıqxana muzeyi menen jáne V.Dal atındaǵı Rossiya ádebiyatı tariyxı mámleketlik muzeyi menen birgelikte óz ara birge islesiw shártnamaların dúzgen.

Usı shártnamalar tiykarında Berdaq atındaǵı Qaraqalpaq ádebiyatı tariyxı mámleketlik muzeyi hám V.I.Dal atındaǵı Rossiya ádebiyatı tariyxı mámleketlik muzeyi birgelikte usı jıldıń 12-13-mart kúnleri «Ádebiyat hám muzey dúnyasındaǵı awdarmalar ǵáziynesi» atamasında xalıqaralıq ilimiy konferenciyası shólkemlestirildi. Konferenciya onlayn formatta Moskva hám Nókis qalalarında bolıp ótti.

Konferenciyanıń ashılıwında Muxammed al-Xorezmiy atındaǵı TITU Nókis filialında onlayn videobaylanıs arqalı V.I.Dal atındaǵı Rossiya ádebiyatı tariyxı mámleketlik muzeyiniń direktorı D.P.Bak, muzeyimiz direktorı Sh.Payzullaeva, Qaraqalpaqstandaǵı Rus mádeniy orayınıń baslıǵı G.Zorkina, I.V.Savickiy atındaǵı Qaraqalpaqstan mámleketlik kórkem óner muzeyi direktorı T. Mkrtıchev, NMPI professorı A.Pirniyazova hám basqalar shıǵıp sóyledi.

Qaraqalpaq xalqınıń tariyxın izertlewde, tariyxıy arxitekturalıq esteliklerin úyreniw hám awız eki ádebiyatın jazıp alıwda, rus tiline awdarıwda rus alım hám jazıwshılarınıń da ayırıqsha úlesi bar. Sonlıqtan da, aldaǵı waqıtları Rossiya ádebiyatı tariyxı mámleketlik muzeyi menen birgelikte muzeylerimizde saqlanıp turǵan qunlı ádebiy shıǵarmalardı rus hám qaraqalpaq tillerine awdarmalaw, olardı óz aldına kitap etip shıǵarıw, ilimiy-izertlew jumısların alıp barıw – baslı maqsetlerimizden esaplanadı.