Konferenciya «Vamberi hám Molla Ísaq: xalıqlar arasındaǵı ádebiy doslıq kópiri»

Berdaq atındaǵı Qaraqalpaq ádebiyatı tariyxı mámleketlik muzeyinde qaraqalpaq ádebiyatınıń kórnekli tulǵası, aǵartıwshı hám shayır Ísaq ibn Ibrahim Qońıratiydiń (1836–1892) tuwılǵanına 190 jıl tolıwı múnásibeti menen «Vamberi hám Molla Ísaq: xalıqlar arasındaǵı ádebiy doslıq kópiri» atamasındaǵı konferenciya bolıp ótti. Konferenciyanı muzey direktorı Sh.Payzullaeva kiris sóz benen ashıp berdi. Keshe dawamında alımlarımız ózleriniń qızıqlı bayanatları menen qatnastı: Sh. Abdinazimov (QMU, f.i.d., professor) — «Qaraqalpaqstanlı tuńǵısh aǵartıwshı»; M. Qarlıbaev (Óz RIA QB, t.i.d., prof.) — «Molla Ísaqtan izlep»; P. Allambergenova (QMU, f.i.k., docent) — «Ísaq ibn Qońıratıy poeziyasınıń qaraqalpaq ádebiyatı tariyxındaǵı ornı»; A. Idirisov (Muzey aǵa ilimiy xızmetkeri, derektanıwshı) — «Ísaq Molla shıǵarmalarında XIX ásirdegi qaraqalpaqlardıń ruwxıy dúnyasınıń sáwleleniwi». Sonıń menen birge, konferenciyaǵa shet el alımları da ayırıqsha itibar qaratıp, ózleriniń video qutlıqlawların jiberdi.

Shıǵıp sóylewshiler

XIX ásir qaraqalpaq ádebiyatınıń belgili wákili bolǵan Molla Ísaqtıń ómiri hám dóretiwshiligi; Shıǵıstanıwshı Herman Vamberi menen bolǵan doslıǵı hám onıń Batıs Evropa mádeniyatı menen baylanısı; J.Shamuratov hám Sh.Payzullaeva tárepinen toplanǵan shayırdıń qosıqlarınıń ádebiy-tariyxıy áhmieti dodalandı. Akademik S.Kamalov atap ótkenindey, molla Ísaq sıyaqlı tariyxıy tulǵalarımızdıń ómiri hám xızmeti haqqındaǵı maǵlıwmatlardı izlep tabıw hám keleshek áwladqa jetkeriw – bizlerdiń muqaddes wazıypamız. Qatnasıwshılar shayırdıń dóretiwshiligin saqlap qalıw hám ilimiy izertlewlerdi bunnan bılay da dawam ettiriw zárúrligine ayrıqsha toqtaldı. https://t.me/berdaq_muzeyi, БЕРДАҚ еди шайырлардың данасы atamasındaǵı telegramm kanalımızdan bárshe ilajlardı kórip barsańız boladı.