Muzeyimiz jańa eksponatlar menen tolıspaqta

Muzey fondına Quran dástúri menen baylanıslı jańa qoljazbalar kelip tústi. Olardıń arasında Quranı kárim nusqaları, sonday-aq, Háftiyak (Qurannıń jetiden bir bólegi qaraqalpaqsha áptúek) bar. Ayrıqsha itibarǵa ılayıǵı, bul qoljazbalar bir-birine baylanıssız eki derekten tapsırılǵan, bul bolsa olarǵa qosımsha ilimiy qunlılıq baǵıshlaydı.

1. Nókis qalası, "Jiydeli baysın" MPJ Baylepesov Kurbanbay aǵa tarepinen tapsırılǵan Quran qoljazbası.

2. Xalqabad meshitinde islewshi Eshimbetov Siypatdin tárepinen meshitke inam etilgen Quranı kárim hám Háftiyak qoljazbası

Eki qoljazbada da kóshirilgen sánesi, jeri, kátibi haqqında qunlı maǵlıwmait beriwshi kolofonı saqlanıp qalmaǵan. Paleografiyalıq belgilerine qaraǵanda eki qoljazba da XIX ásir ortalarına tiyisli ekeni kórinip turıptı.

Nókis qoljazbasınıń hasıl óz muqabası júdá tozǵan halda, onıń sırtınan zamanagóy karton muqaba menen qaplanǵan. Qoljazbanıń negizgi tekstiniń dáslepki betleri joytılǵan, ornına keyinrek kóshirilgen qoljazba qosıp tigilgen. Qoljazba tekstiniń Qurannıń 95- súresi, «at-Tiyn» (Ánjir) súresinen keyingi betleri joǵalǵan.

Xalqabad qoljazbasınıń da aldıńǵı hám keyingi betleri túsip qalǵan. Muqaba eski aǵash fanerge bóz qaplap islengen.

Eki qoljazba da nasx xat usılında qızıl reńli ramka ishine qara sıya menen kóshirilgen. Súre atları, tájwiyd belgileri qızıl sıya menen jazılǵan.

Háftiyak qoljazbasınıń muqabası joq, júdá tozǵan halda saqlanıp qalǵan.

Jańa túsimler derektanıwshılıq tallaw, sonday-aq, qoljazba mádeniyatınıń regionallıq ózgesheliklerin úyreniw ushın imkaniyatlar ashadı. Házirgi waqıtta olarǵa atribuciya hám ilimiy sıpatlama beriw jumısları alıp barılmaqta.