Materiallıq emes mádeniy miyras komitetiniń XX sessiyasında Qobızdı jasaw hám atqarıw óneri YUNESKOnıń Materiallıq emes mádeniy miyras dizimine kirgizildi

Jańla qobız, ásirlerdiń gúwası,

Qaraqalpaq sazlarınıń saǵası.

Qaytqan ǵazday ǵańqıldaǵan únińe

Shadlıq quyǵan jańa zaman dúnyası.

Materiallıq emes mádeniy miyras komitetiniń XX sessiyasında Qobızdı jasaw hám atqarıw óneri YUNESKOnıń Materiallıq emes mádeniy miyras dizimine kirgizilgeni-barlıq Watanlaslarımız ushın ájayıp jańalıq hám quwanısh boldı. Ázelden bay mádeniy miyraslarǵa, tereń tamırlı ruwxıy ǵáziynege ie bolǵan xalqımız ushın bul ózgeshe tariyxıy waqıya. Ásirese, sońǵı waqıtları Qobız muzıka ásbapın soǵıw óneri hám Jıraw atqarıwshılıǵı dástúri joǵalıp ketiw qáwpi aldında turǵanın esapqa alǵanda, bul jańalıq óshpes qádriyatlarımızdıń qaytadan jańalanıwı, milliy miyraslarımızdıń máńgilikke saqlanıwǵa jol alǵanı. Qobızdıń jaǵımlı namaları jáhán saxnalarında jańǵırıp, ata-babalarımızdıń qaldırǵan miyrası búgingi kún menen keleshegimizdi baylanıstırǵan kópir wazıypasın atqaradı desek qátelespeymiz.