«Berdaq kúnleri» Qaraqum iyshan medresesine zıyarat shólkemlestirildi.

«Berdaq kúnleri» hápteligi sheńberinde muzey jámááti, Berdaqtıń áwladları, sonday-aq keń jámietshilik wákilleri menen birgelikte ullı babamız Berdaq Ǵarǵabay ulınıń máńgilik qonım tapqan ornına, babamız bilim alǵan Qaraqum iyshan medresesine zıyarat shólkemlestirildi. Dáslepki qádemimiz–xalqımız tariyxında bilimlendiriw orayı bolıp óshpes iz qaldırǵan Qaraqum iyshan medresesi boldı. Muzeydiń aǵa ilimiy xızmetkeri, Qaraqum iyshannıń áwladı Á.Idrisov zıyaratshılarǵa xalqımızdıń bilimlendiriwiniń rawajlanıwında ornı girewli, óz dáwirinde Orta Aziyadaǵı eń úlken bilimlendiriw ornı bolǵan medreseniń tariyxı, bul mákannan shıqqan ulamalar haqqında aytıp berdi. Bunnan soń zıyaratshılar babalar ruwxı ushın duwa tiláwatların oqıp ruwxların shad etti. Berdak shayırdıń ustazı, ullı klassik shayır Kúnxoja Ibrayım ulına arnap salınıp atırǵan maqbara menen tanıstı. Bozataw rayonı hákimi B.Úbbiniyazov usı orında Berdaq atındaǵı Qaraqalpaq ádebiyatı tariyxı mámleketlik muzeyi wákilleri menen ushırasıp, ishki turizmdi rawajlandırıw máselesinde sáwbetlesti hám birgelikte tiyisli ilajlardı belgilep aldı. Rayon hákimi B.Úbbiniyazov Berdaq babamızdıń súwreti toqılǵan gilemdi muzeyge sawǵa etti. Bul zıyarat saparı – tek ǵana zıyaratlaw emes jas áwladlarǵa milletimizdiń maqtanıshları bolǵan ullı tulǵalarımızdıń xızmetlerin ulıǵlaw, shıǵarmaların úgit násiyatlaw menen birge ishki turizmdi hám zıyarat turizmin rawajlandırıwǵa óz úleslerin qosıwdan ibarat.